Facebook

søndag 19. november 2017

Fantastisk lys

Mangevatna i nydeleg lys i dag

Bøane på Mjåset t.v. Mangevatna t.h.

Selfie i solskin på Toreheia

Utsikt mot Yndestadhøgeheia
Yndestad i dag
Det regna då eg tok avgarde på Toreheia i dag tidleg. Men meldingane var litt betre ut over dagen. Så eg sette mi vòn til at det stemde. Etter at fjellet hadde gjort si tèn på AHIL sin fjelltrim, var det på tide å få opp att boka som skal ligge her fast. Den har lege turt og godt heime.

Eg var komen rett forbi Svartevatnet då sola keik fram oppom Moldura i sør. Strålane gylla  dei haustbrune bakkane i fantastisk lys. Ein kan jo bli reint religiøs av slikt! 

Ovanfor Krikavatna låg det snø. Ikkje så mykje. Snøen var akkurat så lite hard at eg trakka gjennom. Det vart difor noko tungt. Forma har vore betre før. Antal kilo færre. Men opp kom eg meg sjølvsagt. 

Det dreiv inn skyer og byger av snø frå Florø-kanten i nord. Ikkje store mengdene. Det skapte flott lys.

Etter å ha bytt dei sveittevåte klede på overkroppen, gjekk eg så ned att den vanlege ruta på Yndestadhøgeheia. Fjellet som ligg bratt ovanfor Stongfjorden. Når ein ser skilnaden på landskapet oppe på fjellet og nede ved fjorden, er det ikkje så vanskeleg å skjøne kvar folk har busett seg.... Kontrastane er enorme. 

Glimrande tur! 

Foto Toreheia Yndestadhøgeheia 191117


søndag 12. november 2017

Kong Nordavind





 



I dag gjekk eg den flotte runda frå Holevika til Furefjellet og austover nakkane til Høgeheia på Stavenesodden. Returen ned  den gode og merka stien. 

Det heldt seg stort sett opplett. Men det var ikkje meir enn eit par plussgrader, så ein isande kald nordavind måtte eg kle godt ute. Elles var det ikkje eit levande vesen å sjå. Skipstrafikken nord/sør kan vel knapt kallast det.... Fin trimtur! 


lørdag 11. november 2017

Stongsstølen


I dag tok eg turen oppom Stongsstølen og runda Stongsstølsvatnet. Lenge sidan eg hadde vore her.  Det var vått etter alt regnet i det siste.
  
Det er ein liten tur opp Gjerdedalen og Brekkene til Stongsstølen. Men det går diverre ikkje så mykje folk her. I si tid har nok stølen vore mykje brukt, for her ligg restar etter saga og tilrettelagde trapper oppover. Ja ei gamal taubane er her òg. Stølen består i dag av to selshus. På kvar side av vatnet. Dei er i bra stand. Sjølve historia til stølen kjenner eg ikkje noko til. Men det er ein fin tur opp hit.



Stongsstølen nede midt i bildet.
Foto frå Skålefjellet 28/10-17

fredag 10. november 2017

Kong Vinter

Tøft på Skålefjellet i dag

Langevatnet og Smørskornova
Mot Holmedal,
Blåfjellet og Dokka


Moldura, Fanafjellet og Svarthamrane frå Hekkelfjellet

Osland og Oslandsvatnet
Sidan eg fylte 60 i år vart det ei veke ekstra ferie på meg. Det er alltid fint å ha nokre dagar ferie til gode på seinhausten. Så då strauk eg til fjells i dag tidleg. 

Vèret var ikkje av det beste. Ikkje vèrmeldingane heller. Men når sant skal seiast vart det ikkje så hakkande gale. Med eit par skikkelege unnatak. For etter å ha gått frå Oslandsbotnen gjennom Svelia og opp på Hekkelfjellet frå aust, fekk eg meg ei solid hagle- og snøbyge i fleisen nordover til Skålefjellet. Det svartna heilt til frå vest. Ja, det var såpass at eg lurte på om eg skulle feige ut å gå ned att i Svelia.... Heldigvis gjorde eg ikkje det, men heldt fram.... 

No var det ikkje særleg betre på Skålefjellet, sjølv om nedbøren heldt seg vekke. For her bles det kaldt frå nord. Eg valde difor å gå til Botnastølen igjen over Nipane. Det er litt utfordrande å finne beste vegen austover Nipane. Ein må gå på kryss og tvers over alle stupa, hamrane og toppane. I dag låg det i tillegg noko snø som gjorde det ekstra ekstra.... Glatte hamrar og sva er no so... Men utsikta ned igjen til Osland er suveren. 

Utanom nokre ryper og eit havørnpar krinsande over meg på Nipane, såg eg ikkje ein levande skapning. Nei, vent litt - ei mus pila i sikkerheit over snøen og inn i eit trygt hol. Men for andre enn dei nemnde, i tillegg til haren, er det ikkje levande for varmblodige oppe i fjellet no. Det er nemleg full vinter i høgda - og iskald vind. 
Brekka i Oslandsbotnen

Turen i vinterfjellet i dag kravde nok sitt. Nesten 5 timar under slike forhold er utfordrande. Forma har nok òg vore betre. Men alderen er sagt er berre eit tal....→😉

Frå Brekka vest for Botnastølen.
Vi ser mot Ytrevågefjellet.

onsdag 8. november 2017

tirsdag 7. november 2017

mandag 6. november 2017

Vinteren bankar på dør....

Almuen på lørdagt

Mykje spanande på Almuen





Stongfjorden

Osland og Indrevågefjellet, Norddalen t.h.


I regnvèret i går avlyste eg alle fjellplanar. Skodde og silregn gav ikkje akkurat den rette kjensla. Vi reiste heller ein tur til Dale og traff deler av slekta. Det er alltid gode bollar og kaffi på Almuen, så der er ein fin plass og ta ein time eller to ein lørdag. Praten går godt då. 

I dag tidleg stakk eg på Moldura og fekk på plass igjen turboka. Den har hatt eit tørkeopphald heime, men no var det på tide å få den på plass igjen i nordsida på varden. 

Det vart både skodde og snøslette på turen. Ja, ganske tøft og kaldt. Men eg fekk som vanleg skifta på meg tørt ty på overkroppen bak varden. Psyken får seg ein god boost då. Brått small det eit hagleskot. I nærleiken ute i skodda. Rett nedom toppen traff eg så på to karar med våpen. Eg slo av ein prat med dei. 

Returen tok eg så via Størdalsstauren. Det letta faktisk litt lenger nede. Ja, det var til og med sol rundt omkring. Fint og vindstille. Kjekk tur!




lørdag 28. oktober 2017

Vått og godt...

Foto heime frå tidlegare i veka
(bildet låg på brikka og same fila med bilder frå i dag)


Vardenova i midten. Heileberget t.h.


Sørover mot Sogn og Lihesten.
Blåfjellsåta og Blåfjellet i Holmedal



Det vart tur på Skålefjellet og vidare sørover til Hekkelfjellet i Holmedal i dag. Deretter vestover til Mannskaret og til Stongfjorden igjen via Brekka og Gjerdedalen. 

Det var vått. Ei sugande bløyte i motabakkane. Forma har nok dessutan vore betre, så det vart eit slit å kome seg til topps. Her oppe bles det isande kald nordavind. Eg bytte difor alt av klede på overkroppen. Når i tillegg sola stakk gjennom, kjendest raskt kroppen og psyken betre ut. Så eg gav meg i kast med det steinete og våte landskapet sørover til Hekkelfjellet. 

Vel, sol vart igjen avløyst av regn. Om att og om att. Det var eit løye vèr. Og etter å ha passert Siklabergvatnet på veg vestover mot Mannskaret, seig det i tillegg på med skodde òg. Eg valde difor å kome meg til bygds att via Gjerdedalen. 

Vått og godt heiter det visst. Haust er det iallefall i fjellet....!



torsdag 26. oktober 2017

søndag 22. oktober 2017

Vandring i gull 2

Florø og Svanøy

 


Eg tok det heilt piano i gråvèret i dag tidleg. Vèrmeldingane synte litt betre ut over dagen. Det stemde på ein prikk. For då eg i 11-tida gjekk forbi Rinda på veg på Toreheia skein sola. Ok. Det var vind. Ganske sterk vind forbi Krikavatna. Bølgjene gjekk kvite på vatnet. Vidare oppover tok vinden òg godt. Men du verda kor fint det var då sola skein utover det brune landskapet. Florø lyste opp i sola i nord og Svanøya låg som ei perle nett nedom føtene. Kombinasjonen med brun vegetasjon, blå himmel og blått hav, er veldig flott. Ja, hausten er ei nydeleg tid.  

Etter å ha toppa ut, valde eg så å gå ned igjen via Yndestadhøgeheia. Då fekk eg vinden i ryggen. Sola skein over Stongfjorden og heim igjen frå der eg gjekk i himmelsjå over bygda og fjorden. Jammen flott denne ruta. Sjølve nedstigninga tok eg via Selda. Raskare det enn om Rinda når ein kjem denne vegen. Flott trimtur igjen!

lørdag 21. oktober 2017

Vandring i gull..

Litt i lè bak varden...

Moldura

 

Foto Hekkelfjellet 211017

Mot Dalsfjorden i sør


I dag gjekk fjellturen til Hekkelfjellet i Holmedal i lag med Olaug. Vi gjekk opp frå vassverket. Det er ei stund sidan eg har gått opp frå denne sida. Eg går mest opp i dette fjellområdet frå nord. Eg slepp å køyre då.... 

Det var eit nydeleg vèr på morgonen. Men ein relativt sterk søraust vind. Noko av grunnen til at vi valde denne turen. Vi fekk då vinden mot oss på toppen, medan det var ganske stille oppover. 

Elles var det eit fantastisk lys vestover mot Dokka og Moldura då sola stod opp. Vi gjekk i skuggen forbi Kleppenesstølen, Bogestølen og deretter Bakkestølen, medan sola skein over landskapet som gull vest for oss. 

Meininga mi var å gå nordover til Svarthamrane og Skålefjellet og ned igjen til Stongfjorden den vegen. Olaug skullle gå ned igjen til Holmedal. Men på toppen ombestemte eg meg. Det bles så kraftig at eg miste lysta. Eksponert som eg ville blitt for vinden heile den vegen. 

På veg til Holmedal igjen traff vi fleire damer på veg oppover. I tre puljer. Fleire som ville nyte denne nydelege haustdagen i fjellet. Eg sneik meg til eit bilde av Anne og Olaug.